(呢篇係感想黎，打得有D長，如果大家覺得悶可以直接跳去下篇先開始睇=))
聽日就去澳洲啦!心情真係有D緊張
因為黎緊應該都有一段時間見唔到大家,所以就開呢個BLOG寫日記分享下我既遭遇,順便同屋企人定時報個平安!
Daddy Mami放心啦,我萬事都會小心的，我保證我一定會平安咁番黎
可惜本人自從中學都無完整咁寫過一篇中文,如果寫得唔通順或者己經睇唔明我寫緊乜，希望大家忍耐下
自從落實左今次既計劃之後，有好多人問我:「點解有咁既決定呀?」「咁突然既?發左達呀?」「過去溝鬼妹呀?」「有份咁好既工都辭職? (呢個我下面再講下)」.....
其實我一直都無好好咁解釋過，一來因為唔係咁易一次解釋哂，二來因為本人其實係一個極無耐性既人，有時都唔係答得好詳細,多謝大家都無嫌我答得太行。不如就趁呢度打D原因出黎。
呢個諗法係起源於大學做暑期工個陣，見到同公司事有班會計岩岩做夠3年考到個牌，就成班係度講去working holiday。個陣仲係大學雞滿懷理想既我,聽到有D咁正既計劃梗係不斷追問，而我個陣己經幻想將來好似佢地咁，不過都只係好初步咁諗。
畢左業之後,好好彩真係入左PwC (big 4之1,對行外人黎講即係4大會計師行,對行內人黎講即係EDPK)。
我係WINTER BATCH,一入去就係核數行業既PEAK SEASON
，俾人BOOK左去鰂魚涌太古坊出JOB。仲記得第1日己經做到P,9:30PM 先有得走,我同同我一齊join firm既 SAM大急急腳咁落去下面間大家樂睇下仲有無飯食
落到去好彩仲有最後幾款,求其揀左樣食飽就算。雖然唔係食2手飯,但係種感覺都係咁空虛咁寂寞咁凍。
仲記得個拖地姐姐同我地講:「慢慢食啦，未關門架!」個刻我真係好感動
食完我同SAM大講:「好WOK呀，唔知聽日幾點先走得呢
」結果第2日就2:00.....wtf
之後3年既地獄生活就往事不堪回首了。
呢3年裏面所遇到既事基本上都係超WOK-->少少成就以為開始HANDLE到-->挫折-->超WOK-->少少成就以為開始HANDLE到-->挫折....不斷LOOP落去。到最後身經差左好多，同埋唔會再諗自己可以做到D咩，而係煩惱黎緊呢個難關可以點樣捱過到同點樣可以無咁痛苦。好迷茫點解所有野會變成咁。
"We always get lost at 25".我唔係好知自己黎緊應該搵咩工,而且再做第2份工我都要趁30歲前QUIT先可以參加working holiday，所以我下定決心，夠鐘之後無耐就遞左信決定去澳洲。我真係覺得其實好多時我地心裏面都知道自己應該點行,只不過係差少少勇氣。
原因就講到呢度，經過3年既痛苦,上個月終於收到個會計師章
佢封信竟然叫我地出街個陣都掛住佢,我心諗一句做乜x 
如果有人有興趣入會計呢行,真係要諗清楚，少D意志都玩完呀!
題外話講多少少，呢3年以黎呢段片陪我度過左好多個返工既星期6,日:
http://www.youtube.com/watch?v=iFCCe9grYs0
如果你唔識佢，可以睇下呢個勒邦占士生涯既SUMMARY:
- 在2003年6月26日的NBA選秀會上以第一輪第一順位被克里夫蘭騎士選中，成為史上最年輕的選秀狀元，未出道己被認定是下一位球王
- 在克里夫蘭騎士隊留了7年,始終未能奪得總冠軍,好多人開始懷疑當初對佢既期望
- 2010年7月8日，宣布與熱火隊簽約。此事讓克里夫蘭騎士隊的球迷為之氣結，甚至公開燒毀市面販售的占士的球衣
- 2012年，終於帶領熱火奪得總冠軍，並當選季後賽最有價值球員
有邊個唔想跟住一條最理想既路黎行，可惜世事好多時都係事與願違。占士既故事鼓勵左我好多，亦可以話推動左我去WORKING HOLIDAY，希望大家有機會都可以留意下佢既故事。
最後仲要多謝呢幾個禮拜陪我食散水飯既親戚朋友，其實每一餐都令我好感動。返黎之後我地再一齊食飯呀!
岩岩發現原來自己呢篇真係打到好長。老老實實，如果係人地打到咁長我應該唔會睇不過如果你真係一直睇到呢度,真係好多謝你聽我講咁多野。放心啦!以後個D應該會輕鬆同短好多!希望你地會繼續黎一齊睇下我點樣俾澳洲玩殘啦!
p.s.
其實今次旅程有另1位主角,就係我婆婆
(呢張相我係大表姐個FB偷番黎,haha.因為我真係好鍾意呢張相,令我諗番起以前一齊係常滿飲茶食飯既日子。唔好意思呀大表姐~~)
細個個陣成日聽你講大個左有錢去環遊世界。可惜係我未有錢之前，你就離開左了。但係我知道,只係因為"The God wants to live with you".你就係天上面望住我地。
一個會計師牌，背後唔單止係我1個人既小成就，而家幾代人努力奮鬥既成果。希望可以將佢賜俾婆婆你。
今次去澳洲，我唔係1個人去，因為我知道你係同我一齊。我地一齊去澳洲玩啦婆婆~!!
留言列表
